స్థానిక సంస్థల ఎన్నికలే లక్ష్యంగా తిరుపతిలో వైఎస్సార్‌సీపీ సమరశంఖం<span style="background-color: transparent;"> శ్రేణులకు దిశానిర్దేశం</span>

తిరుపతి.   నగరంలోని పీఎల్‌ఆర్ కళ్యాణమండపంలో ఆదివారం నిర్వహించిన ఉమ్మడి చిత్తూరు జిల్లా వైఎస్సార్ కాంగ్రెస్ పార్టీ విస్తృత స్థాయి సర్వసభ్య సమావేశం విజయవంతంగా ముగిసింది. పార్టీ రీజినల్ కోఆర్డినేటర్ పెద్దిరెడ్డి రామచంద్రారెడ్డి, జిల్లా అధ్యక్షుడు భూమన కరుణాకర్ రెడ్డి, మాజీ మంత్రులు ఆర్కే రోజా, నారాయణస్వామితో పాటు ఉమ్మడి జిల్లాలోని నియోజకవర్గాల ఇన్‌ఛార్జ్‌లు, నాయకులు, కార్యకర్తలు భారీ సంఖ్యలో పాల్గొన్న ఈ వేదికపై రాబోయే స్థానిక సంస్థల ఎన్నికల వ్యూహాలు, క్షేత్రస్థాయిలో పార్టీ బలోపేతంపై విస్తృతంగా చర్చించారు. గ్రామ స్థాయి నుంచి జిల్లా స్థాయి వరకు ప్రజా సమస్యలపై నిరంతరం పోరాటం సాగిస్తూ ప్రజలకు మరింత చేరువ కావాలని నేతలు పిలుపునిచ్చారు.ఈ సమావేశంలో చంద్రగిరి నియోజకవర్గ సమన్వయకర్త చెవిరెడ్డి మోహిత్ రెడ్డికి పెద్దిరెడ్డి రామచంద్రారెడ్డి పార్టీ గుర్తింపు కార్డును అందజేయడం ప్రత్యేక ఆకర్షణగా నిలవగా, అంకితభావంతో పనిచేసే కార్యకర్తలను ప్రోత్సహించడం ద్వారానే సంస్థాగత బలం సాధ్యమని నాయకులు స్పష్టం చేశారు. విద్యార్థి విభాగం వర్కింగ్ ప్రెసిడెంట్ చెవిరెడ్డి హర్షిత్ రెడ్డి కూడా హాజరైన ఈ వేదికపై యువత, విద్యార్థులను పార్టీ సిద్ధాంతాల వైపు నడిపించడంలో వారి పాత్ర కీలకమని నొక్కిచెప్పారు. అనంతరం మాట్లాడిన మోహిత్ రెడ్డి, రాబోయే స్థానిక సంస్థల ఎన్నికల్లో ఏకగ్రీవాలకు తావులేకుండా ప్రజాస్వామ్యబద్ధంగా బలంగా పోటీ చేసేందుకు సిద్ధంగా ఉన్నామని, గ్రామాల్లో పార్టీ శ్రేణులను సమన్వయం చేస్తూ ముందుకు సాగుతామని ప్రకటించారు. పార్టీ అధ్యక్షుడు వైఎస్ జగన్ మోహన్ రెడ్డి నాయకత్వంలో అందరూ ఐక్యంగా పోరాడి ప్రజా విశ్వాసాన్ని చూరగొనాలని సీనియర్ నేతలు సూచించడంతో ఈ విస్తృత స్థాయి సమావేశం పార్టీ శ్రేణుల్లో నూతనోత్సాహాన్ని నింపింది.