రెండేళ్లలో చిలకలూరిపేట – నకరికల్లు జాతీయ రహదారి

నరసరావుపేట.(పల్నాడు జిల్లా) సెప్టెంబర్ 25 రాజధాని వాయిస్ :

రెండు రాష్ట్రాల ఆర్థిక, వ్యాపార కార్య‌క‌లాపాల‌కు ఊతం...

చిలకలూరిపేట – నకరికల్ రెండో దశ జాతీయ రహదారి పూర్తయితే ఆంధ్రప్రదేశ్, తెలంగాణ రాష్ట్రాల్లోని నాలుగు జిల్లాలకు మెరుగైన రహదారి కనెక్టివిటీ అందుబాటులోకి వస్తుందని మంత్రి గొట్టిపాటి చెప్పారు. దీనివల్ల ప్రజా రవాణా, సరకు రవాణా మరింత సులభతరం కావడంతో పాటు ప్రాంతాల మధ్య ఆర్థిక, వాణిజ్య, వ్యాపార కార్యకలాపాలకు ఊతం లభిస్తుందన్నారు. నకరికల్ వరకు జాతీయ రహదారి అనుసంధానం పూర్తయితే భవిష్యత్తులో బాపట్ల జిల్లాలోని సూర్యలంక బీచ్ పర్యాటకంగా మరింత అభివృద్ధి చెందేందుకు అవకాశం ఉంటుందని మంత్రి పేర్కొన్నారు.

మెరుగైన రహదారి సౌకర్యాలతో పర్యాటకుల రాకపోకలు పెరగడంతో స్థానికంగా పర్యాటక రంగానికి, యువ‌త‌కు ఉపాధి అవకాశాలకు అద‌న‌పు ప్రయోజనం కలుగుతుందని పేర్కొన్నారు. జాతీయ రహదారుల నిర్మాణం కోసం భూములు ఇచ్చి రాష్ట్ర అభివృద్ధికి సహకరిస్తున్న రైతులందరికీ మంత్రి కృతజ్ఞతలు తెలిపారు. భూసేకరణకు సంబంధించి రైతులకు ఏవైనా సమస్యలు ఉంటే కలెక్టర్, జాయింట్ కలెక్టర్ పరిష్కరిస్తారని చెప్పారు. భూములకు సంబంధించిన సమస్యలను ప్రత్యేక గ్రీవెన్స్ ద్వారా రైతులకు ఎలాంటి ఇబ్బందులు లేకుండా, వారికి ఆర్థిక లాభం చేకూరేలా అధికారులు చర్యలు తీసుకుంటారని ఆయ‌న‌ తెలిపారు.

ట్రాఫిక్ ఇబ్బందులు, ప్ర‌మాదాల‌కు చెక్...

జాతీయ రహదారులకు అనుసంధానంగా బైపాస్ రోడ్ల నిర్మాణానికి కూడా ప్రభుత్వం చర్యలు చేపడుతోందని మంత్రి గొట్టిపాటి తెలిపారు. బైపాస్ రోడ్డు నిర్మాణంతో నరసరావుపేటలో ట్రాఫిక్ ఇబ్బందులు తొలగుతాయని చెప్పారు. పట్టణ ప్రాంతాల మీదుగా వెళ్లే వాహనాల ఒత్తిడి తగ్గడంతో జాతీయ రహదారులపై ట్రాఫిక్ నియంత్రణలోకి రావడంతో పాటు రోడ్డు ప్రమాదాలు కూడా గ‌ణ‌నీయంగా తగ్గే అవకాశం ఉంటుందని ఆయ‌న‌ పేర్కొన్నారు.

చిలకలూరిపేట – నకరికల్ రెండో దశ జాతీయ రహదారి ప్రాజెక్టును నిర్దేశిత గడువులో పూర్తి చేయాలని కాంట్రాక్ట్ సంస్థతో పాటు సంబంధిత అధికారులను ఇప్ప‌టికే కోరినట్లు మంత్రి తెలిపారు. ప్రాజెక్టు పనుల్లో వేగంతో పాటు నాణ్యతకు అధిక‌ ప్రాధాన్యం ఇవ్వాలని స్ప‌ష్ట‌మైన ఆదేశాలు జారీ చేశామ‌న్నారు. కార్యక్రమంలో ఎమ్మెల్యేలు డాక్టర్ చదలవాడ అరవింద్ బాబు, ప్రత్తిపాటి పుల్లారావు, ఎంపీ లావు శ్రీకృష్ణదేవరాయలు, కలెక్టర్ కృతికా శుక్లా, జాయింట్ కలెక్టర్ సంజన శ్రీహర్షతో పాటు పలువురు అధికారులు, కూటమి నేతలు, రైతులు పాల్గొన్నారు.